மெடிசன் டுடே. தமிழ் மருத்துவ நூல் ஜனவரி 2017.

மெடிசன்   டுடே.

  

தமிழ் மருத்துவ நூல்

ஜனவரி 2017.

வணக்கம்!

பல வருடங்களாக ஒவ்வொரு ஆண்டும் பொங்கல் நாட்களில் தமிழில் ஒரு முழுமையான மருத்துவ நூலை தொழில் முறையில் தொடங்கி உலகெங்கும் கொண்டு சென்றிட வேண்டும் என்று தோன்றித்தோன்றி மறையும் ஆசை. இது இந்த ஆண்டுதான் கைகூடுகிறது.

ஆங்கில மருத்துவக் கட்டுரைகளைத் தாங்கி மாதம் தோறும் வெளியிடப்படும் இந்த இதழ் மருத்துவ அறிவியலைத் தேடிடும் அனைவருக்கும் பயண்பட வேண்டும் என்ற நோக்கம் கொண்டிருக்கிறது. தமிழ் மொழியில் அறிவியல் கூறுகளை வலுவேற்றிடும் வகையில் இந்த இதழியக்கம் செயல்படும்.

சிந்திக்கும் மொழியில் கல்வி பயிலுவோம்.

நமக்கு அறிவினைத்தந்த தமிழுக்கு அறிவியலைத் தந்திடுவோம்.

இயக்கம்.

தலைமை ஆசிரியர்:

Dr.C.கணேசன் எம்.டி

பேராசிரியர் மருத்துவம்.

இணை ஆசிரியர்

Dr.R.கபிலன் எம்.டி.

மயக்கவியல் நிபுணர்.

உதவி ஆசிரியர்.

Dr..G.அபிநயா எம்.பி. பி.எஸ்.

தொழில்நுட்ப இயக்குணர்

Er.G.அகல்யா B.E.

Associate Software Engineer Accenture.

தகவல் தொடர்பு

உதவி ஆசிரியர்

113 நாடிமுத்து நகர்

பட்டுக்கோட்டை தபா.

தஞ்சாவூர் மாவ

தமிழ்நாடு -

த கு 614 602

email:kpceegan@gmail.com.

visit us @ http://www:medicinetodaytamil@blogspot.com
http://www:medicinetodaytamil@blogspot.in

cell:  +91 7667081110.

உள்ளே

01.ஏட்ரியல் டயஸ்ட்டோல் (Atrial Diastole).

02.அனாக்ஸியா (Anoxia).

03.ஆஸ்பிரேஸன்(Aspiration).

04.அயோட்டிக் வால்வு(Aortic Valve).

05. ஆன்டி கோயாகுலன்ட்ஸ்

06.ஆக்ஸன் பொட்டன்ஸியல் (Action Potential).

07. என்டோதீலியம் (Endothelium).

08. ஏட்ரியம் (Atrium).

09.கொரனரி இதய நோய்கள்  ஆண்களுக்கும் பெண்களுக்கும் வேறுபடுகிறதா? Are  there any differences of Coronary  Heart Disease of men and women?

10. கொரனரி கேர்(Coronary Care).

11. மைட்டோ காண்ட்ரியா (Mitochondrion).

12. மைட்ரல் இன்காம்பிட்டன்ஸ் (Mitral  Incompetence).

13. டீப்பிப்ரிலேஷன் (Defibrillation).

14. ஏட்ரியல் பிப்ரிலேசன். (Atrial Fibrillation).

15. கார் ட்ரை ஏட்ரியம் (Cor Tri Atrium).

16. இரத்தச்சளி (Hemoptysis).

17. சுவாச அலர்ஜி நோய் (Respiratory allergy diseases).

18. ரீகர்ஜிடேசன் (Regurgitation).

19. ஏசிஸ்டோல் (Asytole)

20. பல்மனரி எடிமா (Pulmonary Edema).

21. பிலிபோ த்ராம்போஸிஸ் (Phlebothrombosis).

01.ஏட்ரியல் டயஸ்ட்டோல்

(Atrial Diastole).

பொதுவாக, இதய சிற்றறைகள் (Atrium) சுருங்கும் பொழுது ,இதய பெருவறை(Ventricle) விரிவடைகிறது. இரண்டு இதய பெருவறைகளும் சுருங்கும் பொழுது , இதய அறை இடை வால்வுகள் (Atrio Ventricular Valves) இரண்டும் மூடிக்கொள்ளும். இந்நிலையில் ,இரண்டு சிற்றறைகளும் விரிவடைய ஆரம்பிக்கும். இதுவே ஏட்ரியல் டயஸ்டோல் (Atrial Diastole)எனப்படும்.

இதனால் சிற்றறைகளில் அழுத்தம் மிகவும் குறையும். இதனைத் தொடர்ந்து கீழ்பெருஞ்சிரையிலும் (Inferior Veno Cava) மேற் பெருஞ்சிரையிலும் (Superior Veno Cava) இருந்து வரும் இரத்தம் வலது சிற்றறைக்கு உள்ளிழுக்கப்படும். அதன் பிறகு  இதயத்தில் அடுத்த புதிய இரத்த ஓட்டச்சுற்று (Cardiac Cycle)தொடங்கும்.

                பேராசிரியர் மரு.சி.கணேசன் எம்.டி.  

02.அனாக்ஸியா (Anoxia).

காற்றிலுள்ள ஆக்ஸிஜன் (Oxygen) சுவாசம் மூலம் நுரையீரலுக்கு உள்ளிழுக்கப்பட்டு (Inspiration) வாயுமாற்றம் (Gas Exchange) நிகழ்ந்து .இரத்தத்தில் ஆக்ஸிஜன் உள்ளேற்றப்பட்டு இதயத்தின் செயல்பாடுகள் மூலம் இரத்தம் தமனி குழாய்களில் (Arterial System) செலுத்தப்பட்டு உடல் திசுக்களுக்கு வழங்கப்படுகிறது.

வெளிக்காற்றில் உள்ள ஆக்ஸிஜன் குறைவாக இருந்தாலும் (Less Oxygen), நுரையீரல் கோளாறுகள் (Lung Disorders) இருந்தாலும், இரத்தத்தில் ஆக்ஸிஜனை சுமக்கும் திறன் (Oxygen Carrying Capacity) குறைபாடுகள் இருந்தாலும் திசுக்களுக்கு கிடைத்திடும் ஆக்ஸிஜன் குறைவுபடும். இது அனாக்ஸியா (Anoxia) என்றழைக்கப்படும்.

                                            பேராசிரியர் மரு.சி.கணேசன் எம்.டி.                    

03.ஆஸ்பிரேஸன்(Aspiration).

சாப்பிடும் பொழுது அல்லது மயங்கிய உணர்வு நிலையில் (Unconscious State) இருந்திடும் பொழுது உணவு குழலில் (Esophagus) இருந்து ,உணவுப் பொருள்கள் சுவாச பாதையில் (Respiratory Passage) நுழைந்திடும் நிகழ்வு ஆஸ்பிரேசன் என அழைக்கப்படும். இது ஒரு வகை.

மற்றொரு வகை, உடலில் உள்ள பல உறைகளின் இடைவெளிகளில் உள்ள திரவத்தினை அல்லது காற்றினை இயந்திரங்களை கொண்டு உறிஞ்சி எடுக்கப்படும் சிகிச்சை முறை ,ஆஸ்பிரேசன் எனப்படும்.

நுரையீரலைச்சுற்றி உள்ள புலூரல் ஸ்பேஸ் (Pleural Space) என்னும் வெற்றிடம், குடலைச்சுழ்ந்துள்ள பெரிட்டோனியல் ஸ்பேஸ்  (Peritoneal Space) என்னும் வெற்றிடம், இதயத்தினைச் சூழ்ந்துள்ள பெரிகார்டியல் ஸ்பேஸ் (Pericardial Space)  என்னும் வெற்றிடம் அமைந்துள்ளன.    சாதாரணமாக இந்த இடைவெளிகளில் குறைந்த அளவு திரவம் இருந்திடும். பல நோய்களின் விளைவாக இவற்றில் சுரக்கும் திரவங்களின் அளவு அதிகரித்திடும்.

உ-ம் நுரையீரல் உறையான புலூரல் ஸ்பேஸ் எனப்படும் இடைவெளியில்  இருந்து ,திரவங்களை ஊசி மூலம் எடுக்கப்படும் சிகிச்சை முறைக்கு  புலூரல் ஆஸ்பிரேஸன் (Pleural Aspiration) எனப்படும். 

இதய நோய்களைப் பொருத்து ,இதய உறைகளின் சேர்ந்திருக்கும் திரவத்தை அல்லது காற்றை ஊசிகளின் மூலம் உருஞ்சி எடுக்கப்படும்  சிகிச்சை முறைக்கு பெரிகார்டியல் ஆஸ்பிரேசன் (Pleural Aspiration)எனப்படும்.

இன்னும் சொல்லப் போனால் திரவங்களை உறிஞ்சி எடுக்கப்படுவதுதான் ஆஸ்பிரேஸன் என்று சொல்லிட வேண்டும்.

பெரிடேனியம் என்னும் குடலுறையில் மிகுந்த திரவம் இருப்பது அசைட்டீஸ் (Ascites) எனப்படும் நிலையில் குடலுறையில் மிகுந்த அழுத்தம் இருப்பதால் உறிஞ்சி எடுத்திட அவசியம் இல்லாது திரவம் வடிக்கும் குழாயின் வழியே தானாகவே வடிக்கப்படும். இது அசைட்டிஸ் டேப்பிங் (Ascites Tapping) எனப்படும்.

வயிற்றில் சுரக்கும் அமிலங்களை வெளியேற்றப்பட வேண்டிய சூழலில் அதனை ரைல்ஸ் டியூப் (Ryles Tube) என்னும் குழாயினைக் கொண்டு மூக்கின் வழியே உணவுக்குழாயின் வழியே பெருங்குடலுக்கு செலுத்தி அங்கிருந்து அமிலம் வெளியேற்றப்படும். இது ரைல்ஸ் டியூப் ஆஸ்பிரேசன் (Ryles Tube Aspiration) எனப்படும்.

பேராசிரியர் மரு.சி.கணேசன் எம்.டி.   

04.அயோட்டிக் வால்வு(Aortic Valve).

           இரத்த ஓட்டம் ஒரு திசையில் மட்டும் (Unidirectional) இயக்கப்பட வேண்டும். அப்போதுதான் இதயத்திலிருந்து தொடங்கும் இரத்த ஓட்டமானது ,உடலின் கடைக்கோடி வரை (Periphery)சென்று அடையும். இதயத்தின் கடைக்கோடிப் பகுதிக்கு (Perpheral Parts)இரத்தம் சென்றடையும்  வகையில் ,அதற்கான உயர்ந்த அழுத்த விசை(Hypertension),இடது பெருவறை சுருக்கமடைந்து (Left Ventricular  Contraction) உற்பத்தி செய்யப்படுகிறது.

மிகுந்த அழுத்தத்துடன் மகாதமனியில் (Aorta) முன்னனுப்பப்படும் இரத்தத்தின் அழுத்தம் குறைந்து போகாமல் , மகாதமனியின் (Aorta)சுருங்கி விரியும் தன்மையால் (Elastic Recoiling)பாதுகாக்கப்படும்.

ஆனால் இடது பெருவறையிலிருந்து இரத்தம் வெளியேற்றப்பட்டவுடன் இடது பெருவறை விரிவடைகிறது. அவ்வாறாயின், மகாதமனியில் வெளியேற்றப்பட்ட இரத்தம் ,  இடது பெருவறைக்கு மீள்வரும் (Regurgitation) வாய்ப்பு உள்ளது என்பது விளங்கும்.

இதைத் தடுக்கும் வகையில் ,மகாதமனியின் தொடக்கப் பகுதியில் , வால்வு ஒன்று அமையப்பெற்றுள்ளது. இது அயோட்டிக் வால்வு (AorticValve)) எனப்படும்.

அயோட்டிக் வால்வானது ,மூன்று இதழ்களாக (Leaflet) மகாதமனியின் உட்பகுதியில் அமையப்பெற்ற வளையத்தின் (Valve Ring) மீது கட்டமைக்கப்பட்டுள்ளது.

     மூன்று இதழ்களும் விரிந்து சுருங்கி இரத்த ஓட்டத்தை திசையமைப்பதோடு, மகாதமனிக்குழாயில் இரத்த அழுத்தத்தை (Pressure) பராமரிக்கிறது.

     இந்த வால்வில் பல்வேறு நோய்கள் ஏற்படும். பல்வேறு உடல் நோய்களும் ,இதயத்தின் பல்வேறு நோய்களும் , வால்வின் செயல்பாடுகளை பாதித்திடும். அதுபோன்று வால்வில் ஏற்படும் நோய்களும் இதயத்தின் இடது பெருவறையின் அமைப்பையும் (Structure)> செயல்பாடுகளையும் (Functions) பாதித்திடும்.

பேராசிரியர் மரு.சி.கணேசன் எம்.டி.                     

05. ஆன்டி கோயாகுலன்ட்ஸ்

(Anticoagulants).

இரத்தத்தை இரத்தக் குழாய்களில் திரவ நிலையில் (Liquid State)

பராமரிக்கப்பட்டு, தொடர்ந்து ஓட வைத்திட இரத்தம் உறையாதிருத்தல் வேண்டும்.

    ஆனால் இரத்தத்தை சில வேளைகளில் உறைந்திட (Clotting வைத்திட வேண்டியதும் அவசியம் ( உ-ம் அடிபட்டு காயம் பட்டு இரத்த ஒழுக்குகள் (Hemorrhages) ஏற்படும்போது) என்பதால் ,அவற்றை உறைய வைத்திடும் சில காரணிகள் (Factors) இரத்தத்தில் இயற்கையாகவே அமையப் பெற்றுள்ளன.

     ஆனால் இந்த காரணிகள் மிகுதியாக செயல்பட்டால் இரத்தம் தேவையில்லாத நேரங்களில் உறைந்து போய் இரத்த ஒட்டத்தினை நிறுத்தி அதனால் உடல் உறுப்புகளுக்கு இரத்தம் இல்லாது போக உறுப்புகள் சிதைவடையும்.

மூளையில் பக்க வாதம் (Hemiplegia) இதய தசைசிதைவு (Myocadrial Infarction-Heart Attack) போன்ற நோய்கள் இப்படித்தான் ஏற்படுகின்றன.

மருத்துவச் சிகிச்சைக்காக இந்த இரத்த உறைவு காரணிகளின் வலுவைக் குறைத்தும் ,வலுவை இல்லாது செய்தும் ,அதன் செயல் திறனை தாமதப்படுத்தியும் ,செயல்புரியும் எந்த ஓர் இரசாயாணமும் ,ஆண்டி கோயாகுலன்ட்ஸ் (Anticoagulants)என்று அழைக்கப்படும்.    

பேராசிரியர் மரு.சி.கணேசன் எம்.டி.  

06.ஆக்ஸன் பொட்டன்ஸியல் (Action Potential).

     இதயத்தில் பல்வேறு பகுதிகள் உள்ளதை அறிவோம். இதயத்தின் செயல்பாடுகளுக்கு முக்கியமானவை இதய தசைகளாகும். இதயத்தசைகள் சுருங்கி விரிந்திட மின்னாற்றல் (Electrical Energy) வேண்டும். இதயத்தின் சைனோ  ஏட்ரியல் நோடில்(Sino Atrial Node) இருந்து மின்னாற்றலைப் பெற்ற பிறகு இத்தசைகள் சுருங்கி விரிந்திடும் பொழுது  இதயத்தின் தசைகளிலும் திசுக்களிலும் மின் அலைகளில் மாற்றங்கள் ஏற்படும். இம்மாற்றங்களை இயந்திரங்களின் மூலம் பதிவு செய்து வரைபடமாக வரைந்தால் இவை அலைகள் கொண்ட ஒரு நீளமான  கோடாக பதிவாகும். இதுவே இதய மின்வரைவியின் அடிப்படையாகும். இதய தசைகள் என்பவை அடிப்படையில் மற்ற செல்களைப் போலவே அமையப் பெற்ற ஒரு அமைப்பாகும்.

இந்த செல்களுக்கு உள்ளேயும் செல்களுக்கு வெளியேயும் நடைபெறும் சோடியம் (Sodium) கால்சியம் (Calcium) பொட்டாசியம் (Potassium) போன்ற அயனிகளின் ஏற்றத் தாழ்வுகள் (Fluctuations)செல்களின் மின் அலைகளின் மாற்றங்களை ஏற்படுத்திடும்.

 இந்தமின் அலைகளில் ஏற்படும் மாற்றங்களின் தொகுப்பு ஆக்ஸன் பொட்டன்ஸியல் (மின் செயன்மை -Action Potential) என அழைக்கப்படும்.

     ஓய்வு நிலை (Resting Stage) செல்களில் பொட்டாசியம் செல்களின் உள்ளே அதிகமாகவும் .செல்களின் வெளியே குறைவாகவும் இருந்திடும். மாற்றாக ஓய்வு நிலை செல்களில் சோடியத்தின் அளவு செல்களின் உள்ளே குறைவாகவும் செல்களுக்கு வெளியே அதிகமாகவும் இருந்திடும்.

இதய தசைச்செல்கள் ஓய்வு அதாவது விரிவடைந்த நிலையில் செல்களில் மின்னழுத்தம் -90 mV மில்லி ஓல்ட் ஆக அளவிடப்பட்டுள்ளது. செல்களின் சுவர் வழியே அதிகமான பொட்டாசியம் அயனிகள் உள்ளே அனுமதிக்கப்படுவதாலும் ஏற்கனவே செல்களின் உள்ளே பொட்டாசியம் மிகுந்திருப்பதாலும் அதிக அளவிற்கு மின் அழுத்தம் ஏற்படுகிறது.

இதனை அடுத்து இதய தசைகள் சுருங்கும் பொழுது அதன் செல்களில் பலவித அயனிகள் மாற்றம் நடைபெறுகிறது. தொடக்கத்தில் சோடியம் அயனிகள் உள்ளே அனுமதிக்காத செல்கள் தற்பொழுது விரைந்தும் அதிகமாகவும் சோடியம் அயனிகளை உள்ளே அனுமதிக்கிறது. இது சோடியம் இன் பிளக்ஸ் (Sodium Influx )என்று அழைக்கப்படும். இந்த நிலை மிகவும் குறைவான காலத்திற்கே நடைபெறும். இதைத் தொடர்ந்து சோடியத்தின் உள்வரவு அதிவிரைவில் குறைந்திடும். அத்துடன் கால்சியத்தின் உள் வரவும் (Calcium Influx)அதிகரித்திடும்.

     இதயம் விரிவடையும் பொழுது செல்களில்; எதிர்மறையான அயனிகளின்  மாற்றங்களை ஏற்படுத்திடும். பொட்டாசியம் அயனிகளின் உள்வரவு (Ionic Influx)அதிகரிப்பதோடு சோடியம் (Sodium Influx)மற்றும் கால்சியம்(Calcium Influx) அயனிகள் வெளியேற்றமும்(Ionic Efflux) அதிகரித்திடும். மேற்குறிப்பிட்ட மாற்றங்கள் ECG யில் பதிவுகளாக வரையப்பெற்று இதய நோய் அறிதலில் (Diagnosis)பெரிதும் பயன்படுகிறது.

பேராசிரியர் மரு.சி.கணேசன் எம்.டி

07. என்டோதீலியம் (Endothelium).

இரத்தக் குழாயின் உள்பகுதியில் (Inner Surface)) அமைந்துள்ள ஒற்றை வரிசை செல்கள் என்டோதீலியம் (Endothelium) என்று அழைக்கப்படும்.

தான் அமைந்திருக்கும் இரத்தக் குழாயினை சில இரசாயணங்களைச் சுரந்து  சுருக்கமடைந்திடாமல் விரிவடைந்திட வைத்து இயக்குவதுடன் (Regulation) இரத்தம் உறைதலிலும் (Clotting) என்டோதீலியம் முக்கிய பங்கு ஆற்றுகிறது. இந்த செல்கள் இதயத்தின் உள்பகுதியிலும் (Inside of Heart) நினநீர்க் குழாயிலும் (Lymphatics) அமைந்துள்ளது.

என்டோதீலியச் செல்களில் இருந்து என்டோதீலியம் டிரைவுடு ரிலாக்ஸிங் பேக்டர் ((Endothelial Derived Relaxing  Factor)  என்னும் இரசாயனம் வெளிப்படுகிறது. நைட்ரஸ் ஆக்ஸைடு (Nitrous Oxide)

இரசாயனத்தை அடிப்படையாகக் கொண்ட இந்த இரசாயனம் இரத்தக் குழாயினை விரிவடைந்திடச் (Dilates) செய்திடுகிறது.

அதாவது இரத்தக் குழாய் சுருங்கி செல்களுக்கு இரத்தம் குறைந்து போவதால் ஏற்படும் ஹார்ட் அட்டாக் (Hart  Attack) போன்ற நோய் நிகழ்வை இந்த என்டோதீலியம் டிரைவுடு ரிலாக்ஸிங் பேக்டர் ((Endothelium Derived Relaxing  Factor) தடுத்திடுகிறது.

பேராசிரியர் மரு.சி.கணேசன் எம்.டி.                     

08. ஏட்ரியம் (Atrium).

எந்த ஒரு உறுப்பிற்கும் நுழைவாயிலாக அல்லது நுழைவு அறையாக இருந்திடும்  ஒரு சிறிய முன் அறைக்கு ஏட்ரியம் என்று அழைக்கப் படும்.  .

இதயத்தை பொருத்து உடலின் பல்வேறு பகுதிகளில் இருந்து வந்து சேரும் இரத்தம் இதயப் பெருவறைக்கு (Left Ventricle )செல்வதற்கு முன் இந்த அறைக்கு வந்துதான் செல்கிறது.  இதயத்தில் இடது சிற்றைகள் (Left Atrium) மற்றும் வலது சிற்றைகள் (Right Atrium) என்று  மொத்தம் இரண்டு   சிற்றைகள் அமைந்துள்ளன.

பேராசிரியர் மரு.சி.கணேசன் எம்.டி.                     

09.கொரனரி இதய நோய்கள்  ஆண்களுக்கும் பெண்களுக்கும் வேறுபடுகிறதா?

Are  there any differences of Coronary  Heart Disease of men and women.

ஆம். கொரனரி தமனி(Coronary Artery) இதயத்தின் தசைகளுக்கு – (Cardiac Muscles) இரத்தம் வழங்கிடும் அமைப்பாகும். இத்தமனிகளில் ஏற்படும் நோய்களினால் இதய தசைகளுக்கு வழங்கப்படும் இரத்தத்தின் அளவு குறைவுபடும்.

விளைவு ஹார்ட் அட்டாக் (Heart Attack)  ஆஞ்சைனா(Angina) Heart Failure) போன்ற நோய்கள் ஏற்படும். இவைகள் கொரனரி இதய நோய்கள் (Coronary  Heart Disease)எனப்படும்.

கொரனரி இதய நோய்கள் எந்த நாட்டிலும் எந்த வயதினரிலும் எந்த பாலினத்திவரிலும் எந்த சமூகத்திலும் ஏற்படக்கூடும். என்றாலும் ஒரே நாட்டில் ஒரே சமூகத்தில் உள்ள ஆணுக்கு ஏற்படும் கொரனரி இதய நோய்கள் பெண்களுக்கு ஏற்படும் கொரனரி இதய நோய்களிலிருந்து பெருமளவு மாறுபடுகிறது என்பது நமக்கு வியப்பானதாக இருந்திடும். ஆனாலும் உண்மை இதுதான்.

1. பெண்களில் ஏற்படும் கொரனரி இதய நோய்களின் (கொ.இ.நோ. C.A.D.) வெளிப்பாடும் அது வளரும் விதமும் மாறுபடுவதால் அதன் சிகிச்சை முறையும் மாறுபடுகிறது.

2. பெண்களில் கொரனரி இதய நோய்கள் (C.A.D) ஏற்படும்போது அவர்கள் ஆண்களை விட 10 வயது அதிகம் இருக்கிறார்கள். அதாவது பெண்களுக்கு ஆண்களைவிட பத்து வருடம் கழித்தே இந்த நோய் ஏற்படுகிறது.

3. பெண்களில் பெரும்பாலோரில் உழைப்பின்போது நெஞ்சில் வலி(Chest  Pain) ஏற்படுகிற ஆஞ்ஜைனாதான் முக்கியமான முதல் நோய்க்குறியாகும்.மாற்றாக ஆண்களில் முழுமையான ஹார்ட் அட்டாக்தான் முதல் நோய்க்குறி ஆக இருந்திடுகிறது.

4. பெண்களில் ஏற்படும் வலியானது தெளிவான இதய நோயினை குறிப்பதாக இருப்பதில்லை. அவர்களில் நெஞ்சில் வலியின் போது கொரனரி குழாய் அடைப்பு(Coronary Vessel Block) இல்லாமல் குழாயின் சுவர் சுருக்கமடைந்து (Vessel Wall Spasm)இருப்பதாகக் கண்டறியப்பட்டுள்ளது.அதனால் இதய தசைகளுக்கு இரத்தம் குறைந்து இதயவலி ஏற்படுகிறது என்பது விளங்கிடும்.

5. ஆனாலும் ஹார்ட் அட்டாக் ஏற்பட்ட பிறகு நிகழக்கூடிய உயிரிழப்புகள்(Mortality) (Spasm) ஆண்கள் பெண்கள் இருபாலருக்கும் ஒரே விகிதத்தில் இருக்கிறது என்பதுதான் சற்று வியப்பாகவே இருந்திடுகிறது.

6. கொரனரி இதய நோய்க்காக செய்யப்படும் சோதனைகள் இருபாலருக்கும் வேற்றுமை இல்லை என்றாலும் சோதனையின் முடிவுகளைக் கொண்டு நோய் அறியும் முறை பெண்களில் சற்று மாறுபடுகிறது.

7. கொரனரி இதய நோய்களுக்காக பெண்களுக்கு எடுக்கப்படும் ECG யில் ST மற்றும் T அலைகளில் மாற்றங்கள் ஏற்படுகிறது.

8. பொதுவாக சில பரிசோதனைகளில் பெறப்படும் முடிவுகள் கொரனரி இதய நோய் இருப்பதாக தெரிவித்தாலும் உண்மையில் அவர்களுக்கு நோயேதும் இருப்பதில்லை.

இம்மாதிரியான நிலை சில வேளைகளில் மட்டும் நிகழ்கிறது. இது ஃபால்ஸ் பாசிட்டிவ் (False Positive) என்று அழைக்கப்படும்.

அதாவது ஆய்வுகள் நோய் இருப்பதாகக்காட்டும். ஆனால் உண்மையில் அவர்களுக்கு அந்த நோய் ஏதும் இருப்பதில்லை.

பெண்களில் கொரனரி இதய நோய் கண்டறிய செய்யப்படும் உடற்பயிற்சி இ.சி.ஜி. (Exercise E.C.G.)சோதனையில் ஃபால்ஸ் பாசிடிவ் முடிவுகள் அதிகளவு (ஆண்களைவிட) பெறப்படுகிறது.

9. இதேபோல் கொரனரி இதயநோய் கண்டறிய செய்யப்படும் தாலியம் ஸ்கேன் (Thalium Scan) என்னும் சோதனையிலும் ஃபால்ஸ் பாசிடிவ் முடிவுகள் விகிதம் பெண்களில் அதிகம் காணப்படுகிறது.

10. கொரனரி இதயநோய்களை கண்டறிய கொரனரி ஆஞ்சியோகிராபி (Coronary Angiography)  எனப்படும் சோதனை செய்யப்படும்.

சோதனை செய்யப்படுவதன்  விளைவாக சிறிய மற்றும் பெரிய பக்க விளைவுகள் ஏற்படலாம். இந்த வகையில் பெண்களுக்கு ஆஞ்சியோகிராபி செய்தபிறகு இரத்தக் குழாய் (Blood Vessel) மற்றும் நீரகம் (Kidneys) தொடர்பான பக்க விளைவுகள் (ஆண்களைவிட) அதிகம் நிகழ்வதும் கண்டறியப்பட்டுள்ளது.

பேராசிரியர் மரு.சி.கணேசன் எம்.டி.

10. கொரனரி கேர்(Coronary Care).

இதய தசை சிதைவு (Myocardial Infarction)ஏற்பட சில நிமிடங்களில் சிலர் உயிரிழக்க நேரிடும். உடனடியாக உயிரிழப்பை சந்திக்காத இந்த வகை நோயாளிகளில் பெரும்பாலோர் முதல் சில நாட்களில் மிண்டும் உயிரிழப்புகளை (Mortality)சந்திக்கக்கூடும்.

இதய தசை சிதைவில் ஏற்படும் மரணங்கள் (Death)பெரும்பாலும் அரித்மியா (Arrythmias)எனப்படும் இதயத்தின் சீரற்ற செயல்பாடுகளினாலேயே ஏற்படுகிறது.

இவ்வகை அரித்மியாக்கள் விரைந்து விளைவுகளை ஏற்படுத்திடுவதால் இவற்றை சிகிச்சை செய்திடும் மருத்துவக் குழுக்கள் எதிர் நோக்கி காத்திருந்து கண்கானித்து கண்டறிந்து உரிய சிகிச்சையை உரிய காலத்தில் செய்திட்டால் இவ்வகை உயிரிழப்பு மிக பெருமளவு தடுக்கப்படும் என்பது உறுதி.

இவ்வகை அரித்மியாக்கள் ஏற்படும் பொழுது அதற்குரிய சிகிச்சைகளை அளித்திடவும் அதற்குரிய கருவிகளை கையாளவும் சிறப்பான பயிற்சிபெற்ற மருத்துவ மற்றும் உதவியாளர் குழு அவசியம் என்று சொல்ல தேவையில்லை.

அதிவேகமாக உயிரிழப்புகளை ஏற்படுத்திடும் நோய்களைச் சிகிச்சை செய்திட சிறப்பு இயந்திரங்களையும் சிறப்பு மருத்துவக் குழுக்களையும் கொண்டிருக்கும் சிகிச்சை அமைப்பு கொரணரி கேர் எனப்படும்.

பேராசிரியர் மரு.சி.கணேசன் எம்.டி.

11. மைட்டோ காண்ட்ரியா (Mitochondrion).

     ஒவ்வொரு செல்களிலும் நியூக்ளியஸ்(Nucleus), ரைபோசோம்ஸ்(Ribosomes), என்டோபிளாஸ்மிக் ரெட்டிக்குளம்(Endoplasmc Reticulum), கால்கி அப்பாரட்டஸ்(Golgi Apparatus) போன்று மைட்டோகாண்டிரியாவும் ஒரு நுண்-உறுப்பாகும்.  செல்களின் செயல்பாடுகளுக்குத் தேவையான ஏ டி பி (A.T.P.)யை மைட்டோகாண்டிரியா உற்பத்தி செய்கிறது.

இரண்டு படிவுகளாக (Foldings)அமைந்துள்ள மைட்டோகாண்டிரியா செல்களில் வளர்சிதை மாற்றங்களில் (Metabolism)முதன்மை பங்களித்திடுகிறது. இதன் விளைவாக வளர்சிதை மாற்றம் மிகுந்த செல்களில் மைட்டோகாண்டிரியாவின் எண்ணிக்கை அதிகரித்திருக்கும் என்பதும் வளர்சிதை மாற்றம் குறைந்த செல்களில் மைட்டோகாண்டிரியாவின்  எண்ணிக்கை குறைந்திருக்கும் என்பதும் நமக்கு எளிதில் விளக்கக்கூடியதுதான்.

செல்களுக்கு  ஆக்ஸிஜன் இல்லாது போகும் நிலையில் (Hypoxia)அதன் முதல் விளைவாக அந்தச் செல்களில் உள்ள மைட்டோகாண்ட்ரியாவின் எண்ணக்கை அதிகரித்ததிடும். .

ஒருவரின் உடலில் உள்ள செல்களின் எல்லாப்பகுதிகளும் அவர்களது தாயிடம் இருந்து பாதியும் தங்தையிடம் இருந்து பாதியும் பெறப்படும் என்பதை நாம் அறிவோம் .ஆனால் ஆண் பெண் என்று எல்லோருடைய எல்லா  செல்களிலும் அமைந்திருக்கும் மைட்டோ காண்டரியா மட்டும் தாயிடம் இருந்தே பெற்பபடுகிறது என்பது சிலருக்கு புதிய தகவலாக இருந்திடலாம்.

பேராசிரியர் மரு.சி.கணேசன் எம்.டி.    

12. மைட்ரல் இன்காம்பிட்டன்ஸ் 

(Mitral  Incompetence).

இடது சிற்றறையில்(Left Atrium) இருந்து  இடது பெருவறைக்கு (Left Ventricle) இரத்த ஓட்டத்தை அனுப்பவும் இடது பெருவறையிலிருந்து இடது சிற்றறைக்கு இரத்த ஓட்டம் நடைபெறாமல் தடுக்கவும்  இந்த இரண்டு அறைகளுக்கும் இடையே ஈரிதழ் வால்வு (Mitral Valve) என்னும் அமைப்பு அமைந்துள்ளது. இடது சிற்றறைக்கும் இடது பெருவறைக்கும் இடையே அமைந்துள்ள ஈரிதழ் வால்வின் ஏற்படும் சில நோய்களினால் இவ்வால்வு முழுமையாக மூடாத நிலை ஏற்படும்.இது மைட்ரல் இன்காம்பிட்டன்ஸ் என்று அழைக்கப்படும்.

அந்நிலையில் இடது சிற்றறையிலிருந்து இடது பெருவறைக்கு வரும் இரத்தத்தின் ஒரு பகுதி அளவு மீண்டும் இடது சிற்றறையை வந்தடையும். இதானல் இடது சிற்றறையில் அதன் கொள்ளவும்(Volume) அழுத்தமும்(Pressure) அதிகரித்திடும்.

இதன் விளைவாக மூச்சு திணறல் (Dyspnea)  இதய செயலிழப்பு (Heart Failure) மற்றம் சிற்றறை அரித்மியா (Atrial Arrhythmia) போன்ற தொடர் விளைவுகள் ஏற்படும்.

பேராசிரியர் மரு.சி.கணேசன் எம்.டி.

13. டீப்பிப்ரிலேஷன் (Defibrillation).

இதயத்தில் உள்ள எல்லா சிற்றறை தசை இழைகளும்(Atrial Fibers) எல்லா பெருவறை தசை இழைகளும்(ventricular Fibers) தனக்கான மின் தூண்டல்களை உற்பத்தி செய்து (Automaticity)தனித்தனியே தன்னை இயக்கி சுருங்கி விரியும் தன்மைக் கொண்டதாகும்.

இருப்பினும் இந்த இழைகளின் தன் இயக்க திறனை விட அதிக தன்னியக்க திறனையும்(Automaticity)  மின் திறனையும் கொண்ட சைனோ ஏட்ரியல் நோடு  (Sino Artial Node) என்னும் அமைப்பு இவை எல்லாவற்றையும் கட்டுப்படுத்தி இதயத்தின் செயல்பாடுகளை தனது கட்டுப்பாட்டில் வைத்திருக்கிறது.

இந்த கட்டுப்பாடு மீறப்படும் பொழுது (பல்வேறு நோய் நிலைகளினால்) இதயத்தின் எல்லாத்தசை இழைகளும் தனித்து சுருங்கி விரிகிறது.

இதனால் இதயத்தில் சுருக்க விரிவு நிகழ்வுகள் ஒருங்கிணையாமல் , இதயச் சுருக்க விரிவு நிகழ்வுகள் வலுவிழக்கிறது.

இதன் விளைவாக இதயத்தில் ஓடும் இரத்த ஓட்டம் தடை படுவதுடன் உயிர் ஆபத்துகளையும் நிகழ்கிறது.

இவற்றை சிகிச்சை செய்து பழையபடி இதயத்தின் செயல்பாடுகளை திருப்புவதற்காக மின் தூண்டல்கள் எந்திரம் (Defibrillator)மூலம் வழங்கப்படுகிறது.

இந்த மின் தூண்டல்கள் புதிதாகத் தோன்றிய பெருவறை இழைகளின்

துடிப்பை அழித்து அதைக் கட்டுப்படுத்திடும் வேளையில் வலுவான மின் திறனுள்ள சைனோ ஏட்ரியல் நோடு  (Sino Artial Node)   தனது செயல்பாடுகளில் மீட்சியடைகிறது. இதன் மூலம் மீண்டும் இதய செயல்பாடுகள் மீண்டும் பழைய படி ஒழுங்குப்படுகின்றன.

இந்த சிகிச்சை முறைக்கு டீப்பிப்ரிலேஷன் என்று பெயர்.

பேராசிரியர் மரு.சி.கணேசன் எம்.டி.                     

                 

      14. ஏட்ரியல் பிப்ரிலேசன்.

(Atrial Fibrillation).

எந்த தசைகளாக (Muscles)இருந்தாலும் அவற்றின் இழைகள் (Myo fibrils)அனைத்தும் நேரங்களிலும் படிகளிலும் ஒருங்கிணைந்து சுருங்கினால் மட்டுமே அதனால் முழுமையாக செயல்பட முடியும். பொதுவாக இதய சிற்றறைகள் (Atrium) அழுத்தம் குறைந்த பகுதியாகும். அழுத்தம் மிகுந்த பகுதியான இதய பெருவறைக்கு (Left Ventricle) இரத்தம் அனுப்பப்பட வேண்டிய நிலை இருப்பதால் சிற்றறைகளின் தசைகள் இணைந்தும் சீராகவும்  வேண்டிய அளவு சுருங்கி அழுத்த விசையினை உற்பத்தி  செய்திடப்பட வேண்டும்..

     சில வேளைகளில் இவ்வித ஒருங்கிணைப்பில் குறைபாடுகள் ஏற்படும். இந்நிலையில் சிற்றறையின் தசைகள் பல நூறு எண்ணிக்கையில் தனித்தனி குழுவாக (Groups) சுருங்கி விரிந்து கொண்டிருக்கும். இந்நிலையில் சிற்றறையிலிருந்து பெருவறைக்கு செலுத்திட போதுமான அளவு அழுத்தம் உற்பத்தி செய்யப்படுவதில்லை. விளைவு சிற்றறையில் இரத்தம் தேங்கத்  தொடங்கும் (Stasis).

     அத்துடன் இரத்தம் தேங்குவதால் இரத்தத்திலுள்ள செல்கள் திரண்டு இரத்தம் உறைதல் (Blood Clotting)நிகழ்கிறது. உறைந்த இரத்தம் கட்டிகளாக இருந்திடுவதால் சிற்றறை சுருங்கும் பொழுது அவை இடம் பெயர்ந்து நகர்ந்திடும். இந்த இரத்தக் கட்டிகளின் ஒரு பகுதியிலிருந்து சிறுபகுதி பொது இரத்த ஓட்டத்தில் (Systemic Circulation) கலந்து இரத்தக் குழாய்களை அடைத்திடும் (Block).

 மூளை (Brain)போன்ற பகுதியிலிருக்கும் இரத்தக் குழாய்கள் அடைபட நேர்ந்தால் மூளையின் திசுக்கள் சிதைவுற்று பக்கவாதம் (Hemiplegia)போன்ற பெரும் நோய் நிகழ்வுகள் ஏற்படலாம்.

     ஈரிதழ் வால்வு சுருக்கம் (Mitral Valve Stenosis)> மயோகார்டியல் இன்பார்க்ஸன் (Myocardial Infarction) என்னும் இதய தசைகளுக்கு இரத்தமின்மை தைரோடாக்ஸிகோசிஸ் (Thyrotoxicosis) என்னும் தைராய்டு சுரப்பியின் வேலை மிகு நிலை போன்றவை ஏட்ரியல் பிப்ரிலேசன் (Atrial Fibrillation)ஏற்பட காரணமாகும்.

     சில வேளைகளில் குறிப்பாக முதியவர்கள் சிலருக்கு எவ்வித காரணமுமின்றி ஏட்ரியல் பிப்ரிலேசன் ஏற்படும் என்பது குறிப்பிடத்தக்கது. 

             

பேராசிரியர் மரு.சி.கணேசன் எம்.டி

15. கார் ட்ரை ஏட்ரியம்

(Cor Tri Atrium).

     எந்தப் பிறவி நோய்களையும்  பெற்றிடாத இதயத்தில் மொத்தம் நான்கு அறைகள் (Chambers)உள்ளன. இரண்டு பெருவறைகள்(Ventricles) , இரண்டு சிற்றறைகள்(Atrium) என்பதுடன் இரண்டு சிற்றறையுடன் ,மூன்றாவது ஒரு சிற்றறையும் (Third Atrium)அமைந்திருக்கும் நிலை கார் ட்ரை ஏட்ரியம் எனப்படும்.

நுரையீரலிலிருந்து ஆக்ஸிஜன் மிகுந்த இரத்தத்தை இதயத்தின் இடது சிற்றறைக்கு  அறைகளுக்குச் சுமந்து வரும் சுவாச சிரைகள்(Pulmonary Veins) மொத்தம் நான்கு.

நல்ல நிலையில் இந்த நான்கு சிரைகளும் ,தனித்தனியாக இடது சிற்றறையில் வந்திணைந்திடுகிறது. கார் ட்ரை ஏட்ரியம் நிலையில் ,இந்த நான்கு சிரைகளும் ஒன்றினைந்து தனியானதொரு அறையாக உருவெடுத்திருக்கும்.

இந்த மூன்றாவது அறை ,இடது சிற்றறையின் உள்பகுதியிலேயே (Inside)அமைந்திருந்திடும்.

இந்த அறைக்கும் இடது சிற்றறைக்கும் இடையே ,சிறிய அளவிலான துவாரம் (Hole)ஒன்று அமைந்து ,இரத்த ஓட்டத்தை நிகழ்த்திடும்.     தனித்தனியான நான்கு சுவாச சிரைகளின் வழியே ஓடும் இரத்தத்தைவிட,இந்த மூன்றாவது அறையின் வழியே ஓடும் இரத்த ஓட்டம் குறைவு என்பது உண்மை.அதாவது இந்த துவாரத்தின் அளவு ,நான்கு சுவாச சிரைகளின் வழியே ஓடும் இரத்தத்தின் அளவினை விட ,சிறிதாக இருந்திடும்.

இதனால் இந்த மூன்று அறைகளில் இரத்த ஓட்டம் குறைந்து ,இரத்தம் தேங்கி அழுத்தம் உயர்ந்திடும். அதனால்,சுவாச மண்டலங்களில் (Pulmonary System) அழுத்தம் உயர்ந்து(Hypertension)பல்வேறு விளைவுகளை ஏற்படுத்திடும் என்பது குறிப்பிடத்தக்கது.

                                                பேராசிரியர் மரு.சி.கணேசன் எம்.டி.                     

16. இரத்தச்சளி (Hemoptysis).

  இருமல் என்பது ஒரு முக்கியமான நோய்க்குறியாகும். இருமலின் அளவைக்(Severity of Cough )கொண்டும், இருமல் ஏற்படும் நேரத்தைக் (Time of Cough )கொண்டும், சளியின் நிறத்தைக் கொண்டும்(Color of Sputum) , நாம் இருமல் வர காரணமான முதன்மை நோய்களைக்  கண்டறியலாம்.

அந்த வகையில் இருமலின் போது வெளிப்படும் சளியில் இரத்தம் கலந்திருப்பது அதி முக்கியமானதொரு நோய்க்குறியாகும்.

பொதுவாக நுரையீரல் நோய்கள் (Lung Disease)மட்டுமல்லாது, இதய நோய்களும் (Heart Diseases), இரத்தக் குழாய் நோய்களும்(Blood Vessels Disorders) , இரத்தத்தின்

உறைந்திடும் அமைப்பில் (Clotting Systems) ஏற்படும் கோளாறுகளும் சளியில் இரத்தத்தை உண்டாக்கிடும்.

இதயத்தின் ஈரிதழ் வால்வு சுருக்கம் (Mitral Valve Stenosis), உயரழுத்தம் (Hypertension) இதயத்தின் எம்பாலிசம் (Cardiac Embolism) போன்ற இதய நோய்களும் சளியில் இரத்தத்தை உண்டாக்கிடும்.

பேராசிரியர் மரு.சி.கணேசன் எம்.டி.

17. சுவாச அலர்ஜி நோய்

(Respiratory allergy diseases).

அலர்ஜி நோயின் ஒரு வகை  சுவாச அலர்ஜி நோய் எனப்படும்.  .நமது உடலுக்கு ஒவ்வாத பொருட்கள் சுவாச வழியில் (Respiratory Tract) புகுந்திடும் பொழுது அலர்ஜி நோய் தொடங்குகிறது.இதன் விளைவாக சுவாசக் குழாயில் (Bronchiolitis) அழற்சி ஏற்படுகிறது. இதனைப் பல்வேறு உயிர் இரசாயனங்களும் ((Biochemicals), இயோசினோபில் (Eosinophils) போன்ற செல்களும் நிகழ்த்துகிறது.

இதன் ஒரு நிலையில் சுவாசக்குழாய்கள் சுருக்கமடைந்திடும்.மூச்சுத் (Dyspnea)திணறல் ஏற்படும். மூச்சுத்திணறல் சில நிமிடங்கள் ((Few Seconds) அல்லது சில நாட்கள் (Few days)) தொடரக்கூடும்.இன்னும் சிலரில் சில வாரங்கள் (Few Weeks) கூட ஆகலாம்.

1.   இதன் ஒரு வகை குழந்தைப்பருவத்தில் (Childhood) ஏற்படுகிறது. இவர்களில் பல்வேறு பொருள்களுக்கு அலர்ஜி இருந்திடக்கூடும்.தூசி ((Dust), பறவை இறகு (Feathers), பூச்சிகளின் மகரந்தங்கள் (Pollens) போன்றவைகள் அவற்றில் சில.

சாப்பாட்டில் மீன் (Fish) முட்டை (Egg),பால் Milk) கோதுமை (Wheat) போன்றவைகளும் அலர்ஜியினை ஏற்படுத்தக்கூடும்.

2. இதன் இரண்டாவது வகை குழந்தைப் பருவத்தை தாண்டிய வயதில் வருவது. இந்த வகை நோயாளிகளில் அலர்ஜியை உண்டாக்கிட வெளிபுறக் காரணிகள் (External Factors) ஏதும் இருப்பதில்லை. அதற்கான தேவையும் இல்லாது எல்லா சிக்கல்களும் நிகழும்.

இக்குறைபாடுகள் நோயாளியின் உடலுக்குள்ளே அமைந்திடுவதால் இது உள்ளுறை  ஆஸ்த்துமா (Intrinsic Asthma) எனப்படும்.

3. ஆஸ்த்துமாவின் இன்னொரு வகையில் மூச்சுத்திணறல் தொடர்ந்து ஏற்படும்.சுவாச உறுப்புகள் (Respiratory Organs) முழுமையான அளவில் இயங்கிக்கொண்டிருக்கும்.சளி இல்லாத இருமல் (Dry Cough) ஏற்படும்.நாடித்துடிப்பு மிக அதிகமாக இருந்திடும் (Tachycardia) வியர்வை (sweating) ஏற்படக்கூடும்.உடல் நீலநிறத்தினை (Cyanosis) அடைந்திடக்கூடும்.

4. மற்றொரு ஆஸ்த்துமா வகையில் மூச்சுத்திணறல் நீண்ட நேரம் இருந்திடும்.நெஞ்சில் பாரம் (Chest Tightness) ஏற்படக்கூடும். இழுப்பும் (Wheezing) இடையிடையே இருமலும்;(Intermittent Cough), அதிகரித்திடும்.இந்த இரண்டு நோய்க் குறிகளும் இரவு நேரத்தில் அதிகளவு காணப்படும்.

பொதுவாக சுவாச அலர்ஜி வகை நோய் உரிய சிகிச்சை செய்திடாமல் நிற்பதில்லை.இதுதொடர்ந்து நீடித்தால் மிக அதிகமான மூச்சுத்திணறல் ஏற்படக்கூடும்.அத்துடன் இருமலும் அதிகரித்திடக் கூடும்.இது இதயத்தின் பணிச்சுமையினை  (Work Load of heart)அதிகப்படுத்துகிறது. இதன் மூலம் இதயம் அதிக அளவிற்கு துடித்திட வேண்டிது அவசியமாகிறது.

இரத்த ஓட்ட மண்டலத்தில் ஆக்ஸிஜன் குறை ஏற்படுவது சுவாசத்தமனியின் அழுத்தம் உயர்வதில் (Pulmonary Arterial Hypertension) முடிந்திடுகிறது. இதனை அடுத்து வலது பக்க இதய அறைகளின் (Heart Chambers) அழுத்த நிலைகளும் உயர்வடைகிறது.

வலது இதய அறைகளின் பணிச்சுமை ((Right Heart Work Load) அதிகரித்திடுகிறது.ஒரு நிலையில் கார் பல்மோனேல் (Cor Pulmonale) என்னும் வலது பெருவறை செயலிழப்பு ஏற்படும்.

சுவாச தமனியின் உயர்ந்த அழுத்தம்  ஒரு நிலையில் நுரையீரல்

மண்டலத்தில்  அழுத்த நிலைகளை அதிகரித்திடுகிறது. இதன் ஒரு நிலையில் இதயத்தின் இடது பக்க அறைகளின் (Left Heart Work Load) அழுத்த உயர்வில் முடியும். இடது பக்க இதயமும் பெயிலியர் (Left Heart Failure) என்னும் நிலையினை அடைந்திடும்.

பேராசிரியர் மரு.சி.கணேசன் எம்.டி.

18. ரீகர்ஜிடேசன்

(Regurgitation).

பொதுவில் ஒரு திசையில் ஓடும் திரவம் திசைமாறி எதிர் திசையிலும் பயணிப்பது மீள் ஓட்டம் ரீகர்ஜிடேசன் (Regurgitation)என்று அழைக்கப்படும். இதயத்தில் அமைந்துள்ள நான்கு வால்வுகள் இரத்த ஓட்டத்தை அதன் வழியே அனுமதித்திட தேவையான அளவு சுருங்கி விரிகிறது. வால்வுகளில் ஏற்படும் பல்வேறு நோய்கள் வால்வு மூடிக்கொள்வதை தடுத்திடலாம். அதாவது வால்வுகள் சுருங்கிட வேண்டிய நிலையில் அது விரிவடைந்திட்ட நிலையிலேயே இருந்திடும்.

இதன் மூலம் ஒரு திசையில் சென்ற இரத்த ஓட்டம் திசை திரும்பி அதே வால்வின் வழியே மீளோடும்.

இது போன்ற மீள் ஓட்டம் ஈரிதழ்  வால்வு (Mitral Valve)மூவிதழ்  வால்வு (Tricuspid Valve )மகாதமனி (Aortic Valve)வால்வு (மற்றும் சுவாச தமனி வால்வு(Pulmonary Valve) போன்றவைகளில் ஏற்படும்.

இவ்வாறு வால்வில் ஏற்பட்ட விரிவு நிலைகளை பெரும்பாலும் அறுவை சிகிச்சை (Surgery)செய்தே வால்வுகளை மாற்றி அமைக்க நேரிடுகிறது.

பேராசிரியர் மரு.சி.கணேசன் எம்.டி.                    

19. ஏசிஸ்டோல் (Asystole).

     

உடலுக்கு தேவையான இரத்த ஓட்டத்தை வழங்கிடும் இதயம் ,சீராகவும் ,ஒழுங்காகவும் , சுருங்கி விரிதல் வேண்டும் இதயம் சுருக்கம் அடையும் போது, அழுத்தவிசை (Pressure Energy) உருவாக்கப்பட்டு , அந்த விசையினைக் கொண்டு இதய பெருவறையில் இருந்து ,இரத்த ஓட்டம் நடைபெறுகிறது.

இதயத்தில் இவ்வகை சுருக்கம் ஏற்படாமல் போகும் நிலை, ஏசிஸ்டோல் (Asystole )என்று அழைக்கப்படும்.

அதாவது, இதயம் சுருக்கமடைந்திடாது போய் ,அதன் இயக்கம் முற்றிலும் நின்று போகும்.

   இதய தசை சிதைவு (Myocardial Infarction) மார்பில் அடிபடுதல் (Chest Injury) மற்றும் பல்வேறு வகையான இதய அரித்மியாக்கள் (Arrhythmia) போன்ற காரணங்கள் இந்த நிலையினை ஏற்படுத்திடும்.

பேராசிரியர் மரு.சி.கணேசன் எம்.டி.                     

20. பல்மனரி எடிமா (Pulmonary Edema).

பல்வேறு நுரையீரல் (Lung) இதய (Cardiac) மற்றும் நரம்பியல் நோய்களின்(Neural Disorders)  விளைவாக நுரையீரல் நுண் இழைகுழாய்களில்(Capillaries) ஏற்படும் திரவ இயக்க அழுத்த மாற்றங்களால்(Fluid Dynamics)  நுரையீரல் திசுக்களிலும்(Lung Tissues) காற்று குமிழிகளின் (Alveoli)  உள்ளும் நீர் சுரந்து நீர்த் தேக்கம் (Water Logging) ஏற்படும். இது நுரையீரலில் நடைபெறும் ஆக்சிஜன் மற்றும் கார்பன் டை ஆக்ஸைடின் வாயு மாற்றத்தினை வெகுவாகப்பாதிக்கிறது.

இது பல்மனரி எடிமா (Pulmonary Edema) என்று அழைக்கப்படும். இது ஒரு அவசர மருத்துவநோய் நிலையாகும்(Medical Emergency).

பேராசிரியர் மரு.சி.கணேசன் எம்.டி

21. பிலிபோ த்ராம்போஸிஸ் (Phlebothrombosis).

பிலிபோ த்ராம்போஸிஸ் (Phlebothrombosis) எனப்படுவது சிரை இரத்தக்குழாய்களில் (Veins) இரத்த ஓட்ட வேகம் குறைந்து இரத்த உறைவுகள் (Clot) ஏற்பட்டு இரத்த ஓட்டம் தடைபடும் நிலையாகும்.இவை பெரும்பாலும் கால்களின் ஆழ்-சிரைகளில் (Deep Veins) ஏற்படும் இந்நோய் பெரும் பாலும் பெண்களிலே ஏற்படுகிறது.

இதய செயல்குறைவும் (Heart Failure)  கருவுற்ற காலம் (Pregnancy Period)  மேலும் இரத்த உறைவுகள் ஏற்பட்ட இடத்தில் ஏற்கனவே ஏற்பட்ட காயங்கள் (Injury At The Pace of Thrombosis) மற்றும் அறுவை சிகிச்சை (Operation) போன்றவை இவற்றிற்கான முன்-நிலைகள் (Preconditions) ஆகும்.

காலில் வீக்கமும் (Leg Edema)  வலியும் (Pain)  இருந்திடுவதுடன் இரத்த ஓட்டங்கள் நகர்ந்து (Blood Current) இரத்த உறைவுகள் (Clots) இதயத்தை அடைந்து சுவாச தமனி (Pulmonary Artery) வழியே சென்று குறுகிய தமனிக் குழாய்களை (Smaller Blood Vessels)  அடைத்து அவற்றின் மூலம் நுரையீரல் திசுக்களை (Lung Tissues) சிதைவுறச் செய்திடும் (Infarction)  என்பது உயிர் ஆபத்தான ஒரு விளைவாகும்.

பேராசிரியர் மரு.சி.கணேசன் எம்.டி.                    

அடுத்த இதழ் வெளியீடு

பிப்ரவரி 14 -2017

-----------------